The Wee Wee Man
As I was walking mine alane, Betwixt the water and the wa, And oh there I spy’d a wee wee man, The weeest mannie that ere I saw.
His leg was scarse a shaftmont lang, thick and nimble was his thie; Betwixt his een there was a span, And betwixt his shouthers there were ells three.
This wee wee man pulled up a stone, He flang’t as far as I could see; Tho I had been like Wallace strong, I wadna gotn’t up to my knee.
I said, Wee man, oh, but you’re strong! Where is your dwelling, or where may’t be?
‘My dwelling’s at yon bonnie green; Fair lady, Cum alang, and ye shall see.'
So we’ll awa, and on we rade, Till we cam to yon bonnie green; We lichted down to bait our horse, And up and started a lady syne.
Wi four and twenty at her back, And they were a’ weell clad in green; Tho I had been a crowned king, The warst o them might ha been my queen.
So we’ll awa, and on we rade, Till we cam to yon bonnie hall; The rafters were o the beaten gold, And silver wire were the kebars all.
There were pipers playing in every neuk, And ladies dancing, jimp and sma, And aye the owre-turn o their tune Was ‘Our wee wee man has been lang awa'